
رواية غرام السلطان الجزء الثاني2 الفصل التاسع عشر19 والعشرون20 الاخير بقلم عادل عبد الله
غرام : المهم يا ماما ، نور لما رفض باسل سأل محامي وقاله ان الحل الوحيد علشان اقدر اخد حقي اني ارفع قضية حجر علي بابا واقول ان العقود اللي مع نور دي كلها عقود صورية !!!
جميلة : اوعي يا غرام تعملي كده !!!
غرام : بعد اللي عمله ده كله معايا ومعاكي ولسه خايفة عليه ؟!!
جميلة : لا يا حبيبتي انا خايفة عليكي انتي !! مش غرام بنتي اللي تعمل كده في ابوها مهما كان هو عمل !!! ده غير انه ابوكي يا غرام يعني لو عملتي فيه كده ربنا هيغضب عليكي .
غرام : كنت عارفة يا ماما ان ده هيكون رأيك .
يدخل فارس ومعه العصائر ويضحك : انا عملت العصير واوعوا تتريقوا عليا .
غرام : تسلم ايديك يا عمو ، اكيد هيبقي حلو علشان من ايدك .
فارس : يسلم لسانك يا غرام يا بنتي ، ده والدتك مبتعرفش تقول كلام حلو كده زيك !!!
جميلة : بقي كده يا فارس ؟
فارس : انا بضحك معاكي .
في فيلا سلطان
سلطان : كنتي بتكلمي مين ؟؟
شهد : كنت بكلم نور .
سلطان : كلمتيه في اللي قولتلك عليه ؟
شهد : فيه خبر يا سلطان معرفش اذا كان حلو ولا لأ !!
سلطان : ازاي ؟!! لغز ده ولا ايه ؟!!
شهد : منار حامل .
سلطان : ما شاء الله ، لا قوة الا بالله ، اللهم لك الحمد ، ده احلي خبر سمعته من زمان ، انتي فاكرة اني علشان مش بكلم نور يبقي مش هفرح له !!!
شهد : لأ مش قصدي ، انا عارفة انك هتفرح بحفيد يشيل اسمك .
سلطان : اومال كنتي تقصدي ايه ؟!!
شهد : قصدي ان ابنك بيشك ان اللي في بطنها مش ابنه علشان لسه بيتعالج !!!
سلطان : أخص !!! ايه السفا.لة دي !!! لأ طبعا منار محترمة و متربية .
شهد : وانت بتتكلم وانت مطمن قوي ليه ؟
سلطان : اولا بحكم خبرتي في الحياة بقدر اميز بسهولة بين اللي عندها واللي معندهاش ، ده غير انها صاحبة بنتي غرام ، وانا واثق في بنتي واخلاقها واكيد صاحبتها هتكون زيها .
شهد : نور مش فرحان و كلم منار وقالها علي شكوكه .
سلطان : ابنك هيدمر حياته وكل اللي حواليه بغباؤه !! ازاي يقول للبنت كده !!
في فيلا نور
يجلس نور في حديقة الفيلا شارد الذهن ويضع قدميه علي الكرسي الموجود امامه ، بينما منار حبيسة غرفتها في الداخل !!!
ثم ينهض ويصعد الي غرفتها ...
نور : هاتي الموبايل ده .
منار : هتاخده ليه ؟ ده الحاجة الوحيدة اللي ممكن تسليني !!
نور : عندك شاشة التليفزيون اتفرجي عليها ، هاتي الموبايل .
ثم يمسك هاتفها من يدها ويأخذه منها عنوة !!!
منار : انت كده ناوي تحبسني بجد هنا !!
نور : لأ انا اخدت الموبايل علشان متتصليش بحد ييجي ياخدك من هنا .
منار : مش ممكن اتصل بماما واقولها علي التخريف اللي انت قولته ده .
نور : تخرييف !! مش هحاسبك دلوقتي علي كلامك ده .
منار : يا نور لو ليا خاطر عندك سيب لي الموبايل .
نور : لأ .
منار : يا نور انا مش ممكن اخونك !! اللي في بطني ده ابنك ، انت ليه مش عايز تصدق ؟!! انت كده بتضيع فرحتنا .
نور : لما اتأكد الاول انه ابني ساعتها هنفرح والدنيا كلها هتبقي تحت رجليكي .
بعد شهر ونصف ...
نور : يلا البسي علشان هنخرج .
منار : بجد ؟!! رايحين فين ؟؟
نور : هنروح نعمل تحليل dna انا حجزت والميعاد بعد ساعة .
بعد اخذ عينات من الجنين وخروجهم من المستشفي ...
منار : علشان خاطري يا نور كفاية كده ، انا كنت حاسة اني مدفونة جوه الفيلا !! خليني ارجع اخرج للدنيا واروح شغلي .
نور : بعد نتيجة التحليل .
منار : يا نور احنا عملنا التحليل خلاص !! نفسي اعرف هتستفيد ايه انك تحبسني في البيت كده ؟!!!
نور : كلها شهر بالكتير ونعرف النتيجة ووقتها اعملي كل اللي نفسك فيه .
منار : طيب ازور ماما ساعة وارجع .
نور : لأ .
منار : طيب هات الموبايل يسليني شوية ، انا هتجنن من قعدتي لوحدي في البيت !!!
نور : هانت ، كلها شهر بالكتير .
بعد ايام ...
في شقة باسل وغرام
الليل قد انتصف بينما غرام تتمدد علي الفراش تلاعب طفلها سلطان وبجوارها باسل يشاركها اللعب معه والضحكات .
باسل " يضحك " : كفاية لعب بقي من الولد ، ابوه ملوش نصيب في اللعب ده ؟؟
غرام : عايز ايه يا حبيبي ؟ ما انت بتلعب معانا اهو !!!
باسل " يضحك " : كفاية بقي ، روحي نيمي سلطان بيه الصغير في سريره وتعالي علشان عايزك في كلمتين .
غرام " تضحك " : كلمتين بس ؟؟
باسل " يضحك " : لما تيجي هتعرفي .
تذهب غرام مع طفلها الي غرفته ، بينما يجلس باسل في انتظار عودتها فاذا به يأتيه اتصال علي هاتفهه !!!
باسل : الو ، ايوه يا ماما ، خير يا ماما اول مرة تتصلي في الوقت ده !!!
شيماء : ألحق يا باسل شوفت ايه اللي حصل ؟؟
باسل : فيه ايه يا ماما ؟ وقعتي قلبي !!
شيماء : منار مرات ابن خالتك .
باسل : مالها ؟؟
شيماء : لقوها مقت.ولة !!!!!
باسل : يا نها.رر اسووود !!! مق.تولة ولا ميتة ؟؟؟
شيماء : يابني بقولك مق.تولة !!!
باسل : ازااي ؟؟ ونور فين ؟؟
شيماء : الشرطة اخدوه وبيحققوا معاه دلوقتي !!!
باسل : طيب اقفلي اقفلي يا ماما .
ينهض باسل من فراشة ويذهب سريعا الي غرفة الاطفال ...
غرام " تضحك " : مستعجل علي ايه ؟ دقتين وارجعلك .
باسل : منار مرات اخوكي اتقت.لت .
غرام " تصرخ " : اييييه !!! انت بتقول ايه ؟؟؟
باسل : ماما اتصلت بيا حالا وبلغتني بالخبر ،انا هلبس واروح لاخوكي في قسم الشرطة .
غرام : استني انا جاية معاك .
في غرفة التحقيق
المحقق : استاذ نور ، ممكن تقولنا ايه اللي حصل الليلة بالظبط ؟؟
نور : انا رجعت من شغلي متأخر كالعادة وطلعت اوضتي علشان اغير هدومي بفتح باب الاوضة شوفتها مرمية علي السرير !! لما شوفتها اتخضيت وافتكرتها اغمي عليها بسبب الحمل ولما روحت افوقها اكتشفت ان مفيش فيها نبض ولا نفس !!!
المحقق : انت خرجت من شركتك امتي ؟
نور : خرجت الساعة تسعة تقريبا .
المحقق : و اكتشفت الج.ثة امتي ؟؟
نور : كانت حوالي الساعة ١١ الا ربع .
المحقق : وكنت فين طول الوقت ده ؟ اكيد المسافة بين شغلك وبيتك اقل من الوقت الكبير ده !!!
نور : ايوه فعلا المسافة بين الشركة وبيتي حوالي نص ساعة .
المحقق : اومال كنت فين ؟
نور : كنت بتعشي بره .
المحقق : انت متعود تتعشي لوحدك بره من غير المدام ؟؟!!!
نور : يعني احيانا لما اكون جعان قوي ومش قادر استني لما ارجع البيت .
المحقق : بردو مش سبب منطقي !!! دي مجرد ساعة واحدة !!!
نور : علشان لما برجع من شغلي متأخر بتكون مراتي نامت .
المحقق : واضح من كلامك ان العلاقة بينك وبين المرحومة كانت متوترة ؟؟
نور : لا ابدا بالعكس ، ده مراتي حامل بعد فترة بدون حمل وعلاج واكيد كنا فرحانين بالحمل ده .
المحقق : مين بيشتغل عندك في الفيلا ؟؟
نور : حاليا مفيش الا اتنين حراس .
المحقق : اتنين حراس ؟!!! مفيش طباخ ولا سفرجي ولا واحدة بتنضف البيت ؟؟ ليه انتوا عايشين في فيلا ولا في سجن ؟!!!
نور : اصل انا ومراتي بنخاف من وجود الشغالين في الفيلا .
المحقق : والسبب ؟؟
نور : بنخاف من السرقة والحاجات اللي بتظهر في الافلام ان الشغالة تلعب علي البيه صاحب الفيلا ، اصل مراتي كانت بتغير عليا .
المحقق : وليه اتنين حراس علي الفيلا ؟؟ انت ليك اعداء او حد ببهد.دك ؟؟
نور : لا ابدا .
المحقق : انت واضح عليك التوتر بشكل غير طبيعي !!!
نور : راجل شاف مراته مقت..ولة اكيد لازم اكون متوتر .
المحقق : طيب يا استاذ نور انت هتفضل معانا لغاية اخر التحقيقات .
تجلس شهد تبكي بحرارة وبجوارها سلطان يحاول تهدئتها ومن الناحية الاخري تجلس شيماء تحاول تهدئتها .
بينما يقف بسام وباسل وغرام علي الجانب الأخر يبدوا عليهم جميعا الحزن والتوتر !!!
وفجأة تظهر ام منار وباقي اولادها وخال منار واولاده وبمجرد ان يروا أهل نور يهرولون اليهم ويتهموا نور بقت.لها !!!
تتدخل قوة الشرطة للفصل بينهما ، وفي تلك الاثناء يخرج نور وعلي وجهه الحزن الشديد والتوتر !!!
شهد تجري اليه وتحت.ضنه : فيه ايه يا نور ؟ العسكري ده ماسكك كده ليه ؟
نور : الظابط قال اني هفضل موجود هنا لغاية اخر التحقيقات !!!
ام منار : عملت ايه في بنتي يا نور ؟؟
ثم يطلب المحقق أم منار لسؤالها واخذ شهادتها !!!
الحلقة ٢٠ ( الاخيرة )
في قسم الشرطة ...
تستمر تحقيقات الشرطة مع جميع المحيطين بمنار حتي صباح اليوم التالي .
تقرر الشرطة احتجاز نور علي ذمة التحقيقات وتوجه اليه الشرطة تهمة القت.ل ، ببنما يتم الافراج عن الباقين !!!
بمجرد علم شهد تسقط ارضا مغشيا عليها !!!
تطلب غرام الاسعاف فورا وتذهب معها الي المستشفي بصحبة سلطان وشيماء وبسام وباسل .
في سيارة الاسعاف.....
تري غرام ابيها يحرص علي وجوده بجانب شهد في سيارة الاسعاف بينما دموعه لا تتوقف ربما حزنا وخوفا علي شهد !!! او ربما حزنا علي نور !!! لا تعلم السبب ولكنها للمرة الاولي التي تري والدها في مثل هذا الضعف !!!
وخلف سيارة الاسعاف يلحق بهم باسل بسيارته ومعه اخيه بسام ووالدته شيماء .
في المستشفي .....
تتأكد غرام ان شهد اصيبت بتجلط دموعي خطير في القلب وان حالتها حرجة للغاية !!!
يراقب سلطان الاطباء دخولا وخروجا من الغرفة بينما غرام لا تبخل بجهد لانقاذها !!!
غرام ومعها عدة اطباء يحاولون انقاذها و اذابة التجلط الدموعي في اسرع وقت .
تقف شيماء في الخارج وتقول لبسام " بعيدا عن سلطان وباسل " ....
شيماء : انا خايفة علي خالتك قوي .
بسام : متخافيش مادام غرام معها .
شيماء : ده انا مش خايفة الا علشان البت دي معها !! انا خايفة تعمل فيها حاجة وهي تحت ايديها دلوقتي !!
يسمعها باسل : خايفة علي خالتي من مين يا ماما ؟؟
شيماء : خايفة عليها من مراتك ، ما انت عارف انها وامها بيكرهوا شهد من زمان !! خايفة تعمل فيها حاجة !!
باسل " بغضب " : انا مراتي مش بتعرف تكره ولا ممكن تأذي حد .
بسام : متخافيش يا ماما حتي لو هي عايزة تعمل حاجة مش هتقدر و هتخاف علشان عم سلطان موجود .
يتركهم باسل غاضبا ويذهب بعيدا !!!
شيماء : كان نفسي تكون يا بسام دكتور زي البت دي ، لكن اعمل ايه تربيتي فيك منفعتش وطلعت صا.يع !!
بسام " يضحك " : بكره تشوفوا الصا.يع ده هيكون ايه وكل اللي شايفاهم دول هيكونوا شغالين عندي ويعملولي الف حساب !!
تخرج غرام من الغرفة وببدو عليها مظاهر الارهاق الشديد !!!
غرام : انا مش هخبي عليكوا ، طنط شهد تعبانة جدا ، ادعولها ربنا يلطف بيها .
سلطان : يعني ايه ؟؟ شهد اااا.
غرام : طنط شهد حصلها جلطة في القلب ولولا عناية ربنا ... لكن الحمد لله قدرنا بصعوبة اننا نذيب الجلطة لكن مش هكدب عليكم الحالة لسه حرجة .
شيماء : وانتي بتعملي ايه !!! مش شهد دي في مقام امك ولازم تراعيها !!
تنظر لها غرام باحتقا.ر وتتركها وتدخل مرة اخري غرفة شهد .
باسل غاضبا : ايه اللي انتي قولتيه ده يا ماما ؟!! يعني بدل ما تشكريها انها انقذت حياة اختك !!
شيماء : بتدافع عنها يا باسل !! هو ده اللي كنت خايفة منه ، مراتك ضحكت عليك واخدتك من امك ، كنت عارفاها انها حرباية زي امها .
باسل : دي اخر مرة اسمحلك فيها تتكلمي عن غرام بالطريقة دي يا ماما .
شيماء : انت بتكلمني كده ليه ؟؟
باسل : علشان انتي بكلامك ده هتخربي حياتي ، وانا مش هسمح بكده ابدا .
بعد اكثر من ١٢ ساعة ...
غرام : بابا ، طنط شهد دلوقتي احسن ، انا حبيت اطمنك ان الخطر قل كتير ، علشان ترجع البيت و ترتاح .
سلطان : انا مش هرجع البيت الا وشهد معايا .
غرام : متخافش عليها يا بابا ، روح انت ارتاح ، هي دلوقتي بقت احسن .
سلطان : الحمد لله ، انا ممكن ادخل اطمن عليها ؟؟
غرام : حاضر يا بابا لكن ياريت بدون اي صوت ارجوك .
يدخل سلطان فيري شهد نائمة .....
سلطان : ممكن يا غرام تسيبيني معاها دقيقتين ؟؟
غرام : حاضر .
تخرج غرام وتغلق الباب ويمسك سلطان يد شهد النائمة ويقبلها وتتساقط دموعه علي يدها وهو يقول : اوعي تسيبيني وتمشي يا شهد ، انا من غيرك ولا حاجة ، انتي حب عمري انتي اغلي حاجة في حياتي ، سامحيني يا شهد ، سامحيني لو في يوم عملت حاجة وزعلتك .
شهد " بصوت ضعيف " : مسمحاك يا حبيبي مسمحاك .
سلطان : الف سلامة يا شهد الف سلامة عليكي يا قلبي .
شهد : الله يسلمك ، متخافش انا كويسة ، روح انت اقف جنب ابنك ، هو محتاجلك دلوقتي اكتر مني .
سلطان : اطمن عليكي الاول يا حبيبتي وبعدين اروح لنور و مش هسيبه .
تلاحظ غرام من خلف الزجاج افاقة شهد وكلامها مع سلطان فتدخل سريعا وتقول لسلطان : ارجوك يا بابا لازم تخرج حالا ، الكلام خطر جدا علي طنط شهد دلوقتي !!!
يظل سلطان في المستشفي يومين متتالين بلا نوم حتي تتحسن حالة شهد وتبدأ في الاستقرار .
يذهب سلطان الي قسم الشرطة ومعه احد كبار المحاميين ويطلب زيارة نور .
يأتي نور ويرتمي بين احضان ابيه باكيا : والله العظيم مظلوم ، مش انا يا بابا اللي قت.لتها !!
سلطان : ايه اللي حصل يا نور ؟؟
نور : معرفش ، انا رجعت البيت شوفتها كده !!! سامحني يا بابا ، انا عارف اني كنت ابن عاق و عارف اني غلطت كتير ، سامحني ارجوك واوعدك اني ارجعلك كل حاجة الشركة والفيلا وكل فلوسك ارجعهالك و انت اتصرف فيها زي ما تحب ، انا خلاص عرفت غلطتي وان الشيطا.ن ضحك عليا ، ودلوقتي انا مش عايز اي حاجة الا انك تسامحني !!!
سلطان : خلاص يا نور انا سامحتك .
نور " يبكي " : ماما فين يا بابا ؟؟ مجتش معاك ليه ؟!!
سلطان : امك جاتلها جلطة لما عرفت .
ينهار نور باكيا فيحاول سلطان تهدئته : متخافش علي ماما يا نور هي بقت احسن دلوقتي وغرام جنبها .
نور " باكيا " : انا معرفش ازاي كنت اعمي وعملت كل ده معاك ومع غرام !!!
سلطان : قول الحقيقة يا نور علشان الاستاذ المحامي يقدر يساعدك ، انت اللي قت.لت منار ؟؟
نور : والله العظيم لأ .
المحامي : انا قرأت محاضر الشرطة يا استاذ نور وواضح ان موقفك صعب جدا ، يا ريت تقول بالتفصيل كل اللي حصل ؟
نور : انا خرجت من الشركة الساعة تسعة وروحت اتعشيت في المطعم ورجعت البيت و شوفتها كده حتي اني من الخوف مش لمستها !!!
المحامي : طيب المفروض انك هتتعرض علي النيابة النهاردة ، لازم تتمسك باقوالك دي وتنكر اي علم لك بالحادث .
نور : حاضر ، بس خليك جنبي يا استاذ ، وانت يا بابا خليك جنبي وادعيلي ، انا محتاج دعواتك انت وماما دلوقتي قوي .
تنتهي الزيارة ويعود نور الي محبسه .
في مكتب المحققين ...
محقق الشرطة يجلس في مكتبه و يسأله مساعده ....
المساعد : ايه الاخبار يا فندم ؟ دلوقتي حضرتك متأكد ان نور هو الجاني ولا لسه عندك شك ؟؟
المحقق : الحقيقة انا لسه شاكك لكن كل القرائن بتقول انه هو الجاني ، مفيش قدامنا الا اننا نقدمه للمحاكمة والمحكمة اما انها تثبت ادانته او برائته .
المساعد : ويا تري نور لسه عارف ان مراته ماتت ولا عرف انها لسه في غيبوبة ؟؟
المحقق : لاااا الكل عارف انها ماتت ، ولازم الكل يفضل معتقد انها ماتت لحد ما نشوف اذا كانت هتفوق من الغيبوبة ولا هتموت ؟؟
المساعد : انا بتمني انها تفوق من الغيبوبة ؟؟
المحقق : انا روحت اشوفها في المستشفي وفعلا حالتها صعبة جدا ، النزيف الداخلي مأثر علي كل الأجهزة الحيوية في جسمها ومحتاجة معجزة علشان تخف او حتي تقدر تتكلم .
المساعد : انا حاسس ان الجريمة دي وراها سر !!
المحقق : و علشان كده اخفيت نهائيا خبر انها لسه عايشة .
المساعد : المجني عليها لو فاقت ولو حتي خمس دقايق هتكشف الجاني اذا كان فعلا جوزها او حد تاني وكمان هتكشف السر ورا الجريمة .
ينظر المحقق في هاتفهه بعد اشعار الرسائل : لسه رسالة جاية حالا من المستشفي انها بدأت تفوق ، يلا نلحق ناخد منها اي معلومة قبل ما يحصلها حاجة .
في المستشفي
منار تفتح عينيها بصعوبة وتشعر بألم شديد ...
المحقق : الف سلامة عليكي يا مدام .
منار : الله يسلمك ، ااه انا تعبانة قوي .
المحقق : معلش هما كلمتين اخدهم منك واسيبك ترتاحي .
اشارت منار له بالموافقة .
المحقق : مين اللي حاول يق.تلك ؟؟
منار : بسام ابن خالة جوزي .
المحقق : وليه يعمل كده ؟
تحكي منار للمحقق اتفاقها مع بسام والخديعة التي قاموا بها للاستيلاء علي اموال زوجها وممتلكاته .
المحقق : تقصدي ان بسام حاول يتخلص منك علشان ياخد العقود اللي نور مضي عليها وفي نفس الوقت ينفرد بالثروة كلها لوحده و كمان يتخلص منك بما انك الشاهدة الوحيدة عليه .
منار : ايوه ، ارجوك يا فندم لو حصلي حاجة حاولوا تنقذوا ابني اللي في بطني ، وفهموا نور جوزي ان الجنين ده ابنه واني عمري ما خونته ، ممكن اكون خدعته طمع في الفلوس بس مش اكتر .
يشير لها المحقق بالايجاب ثم يتركها وينصرف ويتصل بمساعده ويأمره بالقبض فورا علي بسام !!
في قسم الشرطة
تقف شيماء تبكي وتصر.خ : ابني فين يا حضرت الظابط ؟؟
الضابط : ابنك محبوس جوه ، يلا اتفضلي امشي وجودك ملوش لزوم .
شيماء " بدموع " : حبستوا ابني ليه ؟ بسام معملش حاجة !!!
الضابط : ابنك عمل مصيبة وراح في داهية ، ابنك هو القا.تل !!!
شيماء " تبكي " : ابني !! لااا ، ابني معملش حاجة .
الضابط : طيب امشي دلوقتي والمحكمة هي اللي هتقول .
شيماء : محكمة !!! تاني ...ابني ... بسام .... قت.ل !!!!!! اشمعني انا اللي حظي كده !!!
ثم تضحك بصوت عال ......
بسام قت.ل البت وهيدخل السجن ثم تضحك !!!! وابني التاني راح لبنت الخدامة !!!!!
في قسم الشرطة
يخرج نور من السجن ويعلم بأن زوجته منار مازالت علي قيد الحياة وان من حاول قت.لها هو باسل ويعلم بكل تفاصيل الخديعة التي اوقعته فيها منار قبل الحادث !!!
فيلا سلطان
شهد في الفيلا بعد خروجها من المستشفي .
نور يعود بعد خروجه من السجن .
سلطان : حمدلله ع السلامة يا شهد ، نورت بيتك يا نور .
شهد : الله يسلمك يا سلطان ، انا كنت فاكرة اني خلاص همو.ت ومش هرجع هنا تاني !!
سلطان : بعيد الشر عنك يا حبيبتي .
نور : وانا كمان كنت فاكر اني خلاص ضيعت ومش هخرج من السجن تاني .
شهد : الحمد لله ان الحقيقة ظهرت ورجعت بالسلامة ، ويارب يكون درس العمر واتعلمت منه يا نور .
نور : انا فعلا اتعلمت كتير وندمت اكتر ، بكره الصبح يا بابا هنروح انا و حضرتك علشان ارجعلك الفيلا والشركة و هرجعلك كل رصيد الفلوس اللي اخدتها .
شهد : ربنا يهديك و يكملك بعقلك يا ابني .
نور : انا معرفش ازاي منار قدرت تخدعني وتمضيني علي العقود دي !!! اللي بالخبث والدهاء ده ممكن تعمل اي حاجة ، انا حاسس ان الحمل اللي في بطنها مش ابني .
سلطان : الجنين اللي في بطنها لسه موجود ؟؟
نور : ايوه انا عرفت انه لسه موجود ، لكن حالتها لسه حرجة ولو ما.تت اكيد هيموت معها .
شهد : الا الطعن في الاعراض يا نور !! بلاش تستعجل في الحكم ، لما تظهر نتبجة التحليل وتتأكد ، يمكن يكون ابنك .
فجأة يأتي اتصال لشهد من رقم غريب !!!
ترد شهد علي الهاتف ...
المتصلة : انتي مدام شهد اخت الست شيماء ؟؟
شهد : ايوه انا .
المتصلة : انا جارتها ، ياريت تيجي حالا.
شهد : فيه ايه ؟
المتصلة : اختك مبهدلة الدنيا هنا وكل شوية تخرج البلكونة و تصر.خ وتلم الناس علينا ومش قادرين عليها !!!
تذهب شهد ومعها سلطان ونور الي منزل شيماء فيسمعون صراخها من الباب !!!!!
شهد : فيه ايه يا شيماء ، مالك ؟؟
شيماء تتكلم مع نفسها و تهذي بكلمات غير مفهومة !!!
تنظر شهد لسلطان في تعجب وتحاول الحديث مع شيماء ولكن شيماء تكمل هذيانها بكلمات مبعثرة غير مفهومة وتضحك كثيرا ثم تجري الي النافذة وتطلق صرخات عالية !!!!!
تشعر شهد بحجم المأساة وان اختها قد اصيبت في عقلها !!!
سلطان : مش هينفع نسيبها كده !! وجودهها كده ممكن يكون خطر عليها وعلي اللي حواليها .
شهد : هنعمل ايه ؟؟
سلطان : لازم نتصل بالمستشفي هما يقرروا اذا كانت تتعالج هنا او تتحجز .
في المستشفي
يذهب نور في زيارة منار ...
نور : انا مش جاي اطمن عليكي لأنك متستاهليش ، انا جاي اقولك انتي طالق .
منار : كده كده حياتنا مكنش ينفع تستمر ، لكن اللي يهمني دلوقتي ابنك اللي في بطني .
نور : لسه معرفش اذا كان ابني ولا لأ .
منار : ابنك ، اللي في بطني ابنك يا نور .
نور : حتي لو ابني مش هيشفعلك اني ارجع تاني لواحدة زيك ملهاش امان .
منار : ومين قال اني عايزاك ترجعلي ، انا كمان رافضة ارجعلك .
بعد ايام ...
يذهب نور الي طبيبه المعالج ويتأكد من نتيجة التحليل ان الجنين ابنه .
شهد : شوفت يا نور ، الحمد لله طلع اللي بطنها ابنك ، كنت هتظلمها !!
نور : رغم ان اللي حصل ضيع فرحتي ، لكن الحمد لله ان ربنا كتب لي المعجزة دي .
شهد : وناوي ترجع منار تاني ؟؟
نور : مستحيل أمن لها تاني .
شهد : ده هتبقي ام ابنك !!!
نور : علشان هتكون ام ابني هتنازل عن قضية الاحتيال علشان مستقبل ابني ، لكن مستحيل ارجع لواحدة زي دي .
شهد : هي غلطت غلطة واحدة يا نور !! ومين فينا مبيغلطش ؟!! انت نفسك غلطت و ابوك سامحك .
نور : وانا بعد اللي حصل مش هقدر اسامحها او امن انها تكون مراتي تاني ، انا هبدأ حياتي من جديد لما الاقي الانسانة اللي تستاهل .
بعد ايام ...
سلطان : الو ، ازيك يا غرام يا حبيبتي ، عاملة ايه ؟
غرام : ازيك يا بابا ، الحمد لله انا بخير حضرتك عامل ايه ؟
سلطان : انا الحمد لله بخير ، كنت عايز اشوفك بكره الصبح علشان نروح الشهر العقاري نسجل لكل واحد فيكم نصيبه الشرعي .
غرام : يا بابا ، قولت لحضرتك انا مش عايزة حاجة .
سلطان : لازم تاخدي نصيبك ، ده حقك وحق ابنك ، صحيح الولد ده وحشني قوي لازم اشوفه معاكي بكره .
غرام : حاضر يا بابا ، بعد اذنك اجل المشوار ده يومين علشان انا في مؤتمر طبي في فيينا وراجعة بعد بكره .
سلطان : ما شاء الله عليكي ربنا يوفقك يا حبيبتي ، نأجل المشوار ده لما ترجعي .
بعد شهور ...
غرام : ايه رأيك يا باسل انا عايزة افتحلك مشروع تديره بنفسك .
باسل : لا يا حبيبتي دي فلوسك انتي الافضل تفتحي مستشفي ، انا متأكد انك لو فتحتي مستشفي هتكون انجح مستشفي في مصر .
غرام : انت شايف كده ؟؟
باسل : اكيد .
غرام : يبقي تدير نصيبي في الشركة مع نور .
باسل : لا يا غرام الافضل اني اكون بعيد عن فلوسك تماما ، واخوكي نور اتغير وبيبعتلك نصيبك في ارباح الشركة في مواعيدها ، سبيني انا انجح في شغلي بمجهودي .
في فيلا سلطان
شهد : الف مبروك يا نور ، منار ولدت النهاردة وجابتلك شهد .
نور : الله يبارك فيكي يا ماما .
شهد : الف مبروك يا سلطان بقي ليك حفيدة تشيل اسمك .
سلطان " يضحك " : الله يبارك فيكي يا شهد ، طبعا فرحانة ان البنت علي اسمك ؟!!
شهد " تضحك " : ايوة طبعا فرحانة .
سلطان : فكر يا نور ترجع منار علشان بنتك تتربي في حضنك .
نور : لا يا بابا مستحيل ارجعها ، بنتي لما احب اشوفها هبقي اشوفها بعيد عنها .
سلطان يشرد بذهنه بعيدا !!!!!
تلاحظه شهد وتسأله : مالك يا سلطان ؟ بتفكر في ايه ؟؟
سلطان : سبحان الله ، بنت ابنك اتكتب عليها تتربي بعيد عن ابوها زي غرام بالظبط لما اتربت بعيد عني ، الظاهر ان القدر كفيل انه ينتقم ويرجع الحقوق لاصحابها حتي بدون تدخل منهم !!!
شهد : انت شمتان فيا يا سلطان ؟!!
سلطان : لا يا حبيبتي انتي عارفة انه مش قصدي ، انا بستغرب من تدخلات القدر بس مش اكتر .
بعد شهور ...
يذهب سلطان الي ابنته غرام ليجدها تتابع اعمال بناء مستشفيتها الجديدة .
سلطان : اجمل حاجة عملتيها فكرة المستشفي ، ان شاء الله تنجح وتكون انجح واكبر مستشفي في الدنيا .
غرام : ربنا يخليك ليا يا بابا ، ده كله من خيرك .
سلطان : انتي تستاهلي كل خير يا بنتي ، ياريت تيجي بكره تتغدي معايا ومع شهد ونور .
غرام : معلش يا بابا ، بكره مش هينفع علشان ماما عندها حفل تكريم .
سلطان : تكريم في ايه ؟
غرام : ماما بكره هتاخد وسام الجمهورية في الفنون .
سلطان : ما شاء الله ، جميلة تستاهل كل خير .
في اليوم التالي
في حفل التكريم
تصعد جميلة علي منصة التكريم وتحصل علي الجائزة وسط تصفيق الحضور وبينهم غرام وباسل وفارس الذين يشعرون بالسعادة والفخر .
ويظهر فجأة بين الحضور سلطان ومعه شهد !!!
بمجرد ان يراه فارس بمتعض و يشعر بالغيرة !!!
تنزل جميلة من منصة التكريم وتحت.ضنها ابنتها غرام ويهنئها الجميع ثم يأتي سلطان وشهد ويقدمان لها التهنئة ...
تصافحها شهد وتقول لها : الف مبروك يا جميلة .
جميلة : الله يبارك فيكي يا مدام شهد .
شهد : فرحتلك بجد ، انتي فعلا تستاهلي كل خير وتستاهلي اكتر من كده كمان .
يصافحها سلطان : الف مبروك يا مدام جميلة .
جميلة : الله يبارك فيك .
سلطان : انتي فعلا تستاهلي كل خير وتستاهلي ان غرام تفتخر وتتشرف بيكي في كل مكان .
ثم يصافح سلطان فارس ويقول له " بابتسامة " : الف مبروك يا استاذ فارس للمدام .
فارس : الله يبارك فيك .
سلطان : ربنا يوفقكوا دايما و من نجاح لنجاح بأذن الله .
فارس : ربنا يخليك ، كلك ذوق .
سلطان : مش هوصيك بقي عليها ، انت معاك جوهرة ربنا يسعدكم ويخليكوا لبعض .
تمت بحمد الله